عيد غريب وسعيد جدّاً 💗 كيف عيدكم؟ شفتوا حدا؟ احنا بمدينتا الحمدلله صار مسموح عيلتين يجتمعوا وبدت شوي القوانين تصير أسهل.. . . كلّ عام وإنتوا بخير وحبّ وسلام 🙏🏻

إلى آسية، أنا آسفة أنني بالفترة التي مضت كنت أُعامل أخطاءك البريئة بتوتر مني أكثر من قبل، أنا آسفة أنني أُريدك أن تكبري بتصرفاتك مع أنني أعلم أنك ما زلتِ صغيرة ولست جاهزة بعد.. كل يوم بعد أن تنامي، أُعاتب نفسي، وأعدك دون أن تسمعيني أن أكون غداً أُمّاً أفضل! . . كل عام وأنتِ بألف خير يا حبيبة ماما وصديقتيها الصغيرة ♥️ أُحبك جداً

الأطفال لحد عمر السنة بتكون طريقة تعرفهم على كل اشي عن طريق تمهم.. بكون عندهم فضول استكشاف يعرفوا كيف ملمس الأشياء، كيف شعورها، شو بصير ازا عملو هيك فيها، ..وفي بعضهم لحد عمر التلات سنين تقريباً لحتى يتخلصوا تماماً من هي العادة المهم انه الموضوع صح متعب وبوتر الأُم بس طبيعي كتير ومهمتنا انه نحاول ما نزودها ونمنعهم عن كل شي بسبب خوفنا عليهم.. . المصدر: مجلة parents . . مين طفلها عم بمر بهاي المرحلة؟

برأيي أكتر شي بطبطب على الأُمهات بأي مشكلة بواجهوها، إنه يحسوا إنهم مو لحالهم.. . لكل أُم تعبانة، لكل أُم اشتاقت للروتين والهدوء والبيت المرتب.. لكل أُم اشتاقت للشعور بالاستقرار والأمان وهلأ خايفة وقلقانة حتى لو شوي.. وللأُم الي خلصوا كل الأفكار الي ممكن تسلي فيها ولادها ولسه اليوم بأوله.. ما تنسي إنه كل أُم بكل العالم عم بصير معها هيك! . اليوم خامس يوم إلنا بالبيت (بإستثناء التمشاية لحالنا جنبه) . إنتوا من أي بلد؟ كيف شعوركم؟ 🤗 . . #stayhome #weareinthistogether

بس أتعب، بتذكر ماما كيف وهي عندها ٦ ولاد درست جامعة وتخرجت بإمتياز، وبعدها درست ماجستير وكمان تفوقت.. بس أتذكرها بحس بالقوة، وبحس بالإيجابية.. وبحس بالأمل! .. يا رب أكون لبناتي لو جزء صغير من كيف إنتِ قدوتنا. . اشتقتلك ماما.. كل عام وإنتِ بخير..

الحمدلله إنهم بخير وبصحة منيحة، ومنقدر نقضي وقت مع بعض ونلعب ونعمل نشاطات ونتخانىء ونتعلم ونعمل ذكريات كتير.. الحمدلله أنا ممتنة كتير لوجودي معهم! . . بحس إنه لازم نعتدل بمشاعرنا تجاه الي عم بصير، ونكون مطمنين وناخد بالأسباب بدون تعقيد.. عن نفسي علمت آسية تغسل إيديها أكتر وأحسن، وحكينا شوي عن الجراثيم والمرض والعدوى بس بحاول إنه ما أخلي #فايروس_كورونا مسيطر على تفكيرنا وأحاديثنا طول الوقت.. وبرجع بقول أنا مو خايفة، عم باخد إحتياطاتي بدون توتر 🌼.. عنا سكروا المدارس بس الروضات فاتحة، لسه محتارة إزا أبعت آسية أو لأ وخصوصي إنه روضتها بعتوا إيميل بينصحوا إنه حسب الإحصائات بمدينتا فقط الأطفال الي عندهم أعراض مرض أو ببيتهم في حدا عنده أعراض مرض ما يجوا.. . وعلى فكرة اليوم قرأت إنه زيادة الخوف والهلع والوسواس بيضعفوا المناعة!.. . شو الوضع عندكم وبمدينتكم؟

ما كنت ناوية اجيب سيرة الموضوع أبداً والله ومو كتير بحب أحكي بالمواضيع الجدلية وهيك.. بس يعني بس لحتى أجاوب على السؤال الي كل يوم بيوصلني ٢٠ مرة: . اه عم ببعت آسية على الروضة .. ومو متوترة من كورونا.. أكيد في جزء من الموضوع بخوف وممكن يصير مع أي حدا وبأي مكان وهيك.. بس طول ما الروضة فاتحة أنا مو شاغلة بالي كتير بالموضوع.. ومو خايفة بكل دقيقة وعايشة بدون قلق زايد.. . كل يوم بالليل، بشوف الأخبار.. بدعي للمصابين ب#كورونا يتعافو وبدعي الله يبعدوا عنا وبس.. بصحى تاني يوم بعيش حياتي طبيعي.. . شو الوضع عندكم؟ مين متلي ومين كتير متوتر؟ كلنا عادي على فكرة 🤗انا بس حبيت اجاوب عن حالي

السعادة في مخلوق صغير 💕..

البوست الي قبل هاد كتبت شوي عن الفترة الماضية وعن صعوبة عمر السنتين لأربع سنين (تقريباً) الي فيها الطفل بكون عم يبني استقلاليته وعم بجرب يتعدى الحدود والقوانين الموجودة.. وحكيت اديش كان مهم عندي طول الفترة اني ما أعطي آسية أي القاب متل عنيدة ونكدية و و ..بسبب مرحلة عمرية طبيعية عم بتمر فيها.. كتير من التعليقات كانت عم تذكر صعوبة تعليقات الناس على ولادهم بهاي الفترة.. وتزكرت أنا كمان هاد التحدي الي بواجهه لما التقي بناس وآسية تعمل نوبات غضب أو أو.. . . مرات بتكون أحكام الناس على ولادنا أصعب من تصرفات ولادنا نفسها 💔.. . شو الحل؟ أنا بالنسبة إلي التطنيش هو أحسن حل 💆🏻‍♀️.. بحاول اد ما بقدر ما أضيع طاقتي على أحكامهم..

قربت آسية تصير ٤ سنين.. وتقريباً تقريباً خلصت من الأعراض الشديدة لأصعب مرحلة مرينا فيها بالسنتين الماضيين والي هي مرحلة الاستقلالية الي بتصر عند الأطفال من عمر (سنتين لأربع سنين)، مرحلة نوبات الغضب الي لا تعد ولا تحصى والإصرار على الرأي وكتير أشياء فيها تحدي كبير للأُم والأب.. طبعاً بتوقع عنا كان الموضوع صعوبته مضاعفة بسبب تغيير جذري صار بحياة آسية ومرت بظروف صعبة لما انتقلنا لبلد جديد وغيرنا بيتين وأنا ٤ أشهر من حملي كانو بين المستشفى وبين التخت وانمنعت من اي حركة وبالنسبة الها كل شي هي كانت متعودة عليه انقلب وبعدها وجود اختها الجديدة.. . . المهم الحمدلله عنجد كانت مرحلة صعبة كتير و"تقريباً" عدّت.. وسبحان الله أسهل إشي خلاني أصبر فيها إني بعرف إنها "مجرد مرحلة عمرية بتصير مع كل الأطفال" .. وأكتر تحدي كبير كان إني ما رضيت ولهلأ ما برضى أطلق أي أحكام على آسية بسبب مراحل عمرية طبيعية.. آسية مو عنيدة ومو نِكدة ومو صعبة.. آسية طفلة طبيعية مرت بمرحلة بتحاول تثبت شخصيتها وبسببها كان كتير يتغير مزاجها بس عادي .. 😁 . في حدا بهاي المرحلة؟ صدقوني كل شي طبيعي وكله بعدي وكله عادي 🙏🏻♥️

كلّ عام وأنتِ يا مياسين بهجة الحياة ومهجة القلب.. عمري وروحي إنتي ♥️♥️♥️

الإشي الي بإيدي هو "رجل ثلجي".. آسية عملته وبخيالها هو أحلى رجل ثلجي بالعالم.. لما عملته بمساعدتي كنا انا وياها كتير متحمسين عليه وضلت تحكيلي وتوصفلي وين بطنه وين رجليه وحتى حطيناله شعر ! .. وفاجأتني انها بعد الرحلة هاد أكتر إشي كانت متزكرته وحكت عنه لمعلماتها بكل فخر! ويمكن من وصفها يكونوا تخيلوا رجل ثلجي كبير كتير واله عيون وهيك! .. . . بس أراقب آسية بحس أديش حماسها للأشياء البسيطة كبير! وأديه خيالها واسع.. وأديش الإبداع عند الأطفال ما اله حدود.. وبصفن فينا احنا الكبار! امتى صار خيالنا ضيق كتير؟ امتى الطفل ببطل تسعده التفاصيل الصغيرة؟ امتى كبرنا وصرنا ملولين؟ ليش؟ يا ترى الناس الي كانوا أطفال مبدعين لو ما الناس القريبين منهم كسّروا مجاديفهم يوماً ما واستخفوا بأفكارهم الصغيرة شو كانوا حيصيروا؟ لو إبداعنا كبر معنا أديش حياتنا حتفرق؟ .. . .

أكتب الآن.. وأنا وحدي، في هدوء تام.. لأول مرة منذ ثلاثة أيام.. الحمدلله تحسنت صحة آسية قليلاً بعد مرض شديد أتعبها نهاراً وليلاً .. وأهلكني تماماً.. ثلاثة أيام، زوجي في سفر وأنا تجندت خلال هذه المدة لآسية المريضة ولِمياسين بالكامل.. بكل طاقتي ..شعرت أنه لم يكن لدي وقت حتى للنظر إلى نفسي في المرآة ..ففي النهار فوضى عارمة وفي الليل سهر طويل،وحين تنام آسية تستيقظ أُختها وهكذا.. . دائماً في مثل هذه الأوقات الصعبة، أشتاق لأُمي أكثر.. وأشعر بوحشة ووحدة قاتلة.. هل يوجد علاج لداء الغربة؟ أشعر أنني أعيش على المسكنات.. ففي الأيام العادية أقول أنني تأقلمت عليها، ولكن عند أي موقف صعب تؤلمني الغربة مجدداً.. ويذهب مفعول المسكنات! لم أكن أنوي ذكر الغربة ولكن الحديث عن التعب والوحدة مرتبط عندي بها.. . المهم..ما أردت كتابته هو ..الحمدلله، شعور الهدوء التام رائع.. وأنا ممتنة جداً لهذه الساعة التي مضت بسلام.. ولصور أطفالي التي حتى بعد قمة الإرهاق أستمتع جداً برؤيتهم.. وممتنة الآن لفنجان القهوة والكثير من الشوكولاته.. . أتمنى لي ليلة ألطف اليوم..

لا شيء في هذا الوجود يُعطي لحياتي معنى أكثر منهم.. ومعهم ..لا أدري فعلاً هل يحتاجون هم وجودي فعلاً أكثر من ما أنا أحتاجهم.. لا أتوقع أبداً.. .. فحياتي بهم اكتملت وإن نقصت.. والقلب بوجودهم امتلأ.. والسعادة معهم أكبر وأجمل..

قبل يومين كنت كتير مريضة.. كانت حرارتي طول الوقت ٤٠ وبالتخت، وعندي وجع معدة قوي.. وبهالوقت لا قدرت اكل ولا اشرب ولا حتى ارضع مَياسين طول اليومين.. وعدنان الحمدلله كان موجود وساعدني بالبنات وأعطى مياسين حليب صناعي.. بعدين باليوم التالت تحسنت وحاولت ارضعها ما قدرت ترضع وكل ما تحاول تبكي وانا حسيت اني متأكدة انه خلص ما في حليب أبداً وبديت إكتئاب انها انفطمت وانا كان لسه بدي ياها ترضع طبيعي فترة أطول.. تذكرت القابلة المسؤولة كانت عني بعد الولادة واتصلت فيها وحكيتلها شو صار.. وعلى طول طمنتني انه طبعاً مو يعني انفطمت والغدد قادرة على انها تقدر تنتج حليب حتى لو عنجد راح، بس بدها وقت الهرمونات لترجع ووصتني اضل احاول كل شوي ارضعها (وازا قدرت اسحب ازا عندي آلة سحب) وأشرب سوائل كتير وأشرب شاي الرضاعة الي بساعد على افراز الحليب.. وأخفف تدريجي الحليب الصناعي وحكتلي بالكتير يومين وبيمشي الحالي شوي شوي.. اطمنت كتير وهيني عم بحاول وعنجد في تحسن!!! ادعولي.. وبس كنت بدي ازكر أي أُم عم بتعاني مع الرضاعة بأي شكل من الأشكال إنها ما تسمح لأي حدا يعطيها أي معلومة سلبية .. وانه ازا عندها أي سؤال تتصل وتتواصل مع أخصائية رضاعة طبيعية "مو دكتور مع احترامي لكل الدكاترة وبتمنى ما حدا يزعل منهم".. والأخصائية أكيد حتساعدها وتنصحها.. بس أهم إشي ما نسمح للناس ولا حتى ازا كانوا أهلنا يحبطونا ويخلونا نفكر انه "ما عنا حليب بكفي". وشكراً 😁.. . . . . الصورة كتير قديمة لما كانت مَياسين عمرها شهرين من تصوير الابداع @fatimahamido .. الي صارت فنانة ونسيتنا.. وغطا الرضاعة من أفخم صديقة بتبيع شالات رضاعة رهيبين بالعالم @dimanursingcover